Spreekuur den bario. Djaweps awor dia 4 di ougùstùs lo tin na e bario di Amboina, Nikiboko 11 di ougùstùs, Tera Kòrá 18 di ougùstùs, Playa na Bestuurskantoor dia 25 di ougùstùs i 1er di sèptèmber na Entrejol. E orarionan ta di 9-12 di mainta.

TCB
Riba e tereno di airlift tin movementu.
American Eagle : Gobièrnu ta realisá e importansha pa hasi uso di American Eagle su konekshon ku American Airlines pa pasaheronan/turistanan ku ta konosí ku esaki i ku a yega di usa e  konekshon aki den pasado – te último na aña 2009. Pero na e momentunan aki no ta posibel para garantia pa asina American Eagle bula Boneiru atrobe. Tin vários motibu pa esaki. Entre otro: 1. E kondishonnan pa garantia mínimo a kambia for di dos aña pasa. Awor lo mester paga pa luna en bes di un bes pa aña. Esaki no ta faboresé kompensashon di e lunanan slou ku esnan drùk. 2. Tin un klóusula di kombustibel awor ku por tin efekto negativo ora ku fuel subi. Aunke kisas lo ta bulando ku vuelonan yen tòg lo ta debe sèn di kombustibel ya ku e kosto di fuel a subi i surpasá e punto kumbiní riba dje (esaki ta pasando).

Dor ku American Eagle tin algun tempu for di nos merkado lo bai kosta pa re eduká e konsumidónan ku e ta bek bulando pa Boneiru. E tempu pa yega bek na e nivelnan di pasado ta nifiká invershonnan kuantioso.

Realisando ku kondishonnan di merkado por kambia no ta sera porta pa ku American Eagle. Tin oportunidat dos bes pa aña pa probechá di e kambio den nan schedule – e próksimo ta na Novèmber pa asina kuminsá bula na Febrüari 2012.

Insel Air: Un delegashon di TCB ku representantenan lokal i internashonal a bishita Insel Air na Yüni ku e meta pa diskutí mas airlift pa Boneiru for di merkadonan strategikamente importante pa Boneiru. Komo resultado Insel Air a kuminsá ku un buelo di Boneiru pa Charlotte, North Carolina i a ekstendé e preis di $366 pa Boneiru. Di 18 di yüli Insel Air a anunsiá nan servisio pa Caracas. Den ámbos kaso kantornan di TCB a entamá mini kampaña di merkadeo pa sostené e servisio nobo.

Continental: Reakshonando riba kehonan ku e preis di tíketnan tabata muchu haltu, TCB Nort Amérika i Caradonna Dive Adventures (un di e tòp dive tour operatorsnan) a aserka Continental. Komo resultado Continental a introdusí un preis di $700 den merkado (total ta $765 inkluso gastu i impuesto di salida) for di Newark i Houston kuminsando promé di ougùstùs te ku 10 di desèmber. E informashon aki a bai pa tur nos tour operadónan, hotèl i pa fin di e siman aki tin un kampaña via i-meil pa konsumidónan.

Airport
Siman pasa dia 29 di yüli manera planeá aeropuerto su pista di aterisahe a bira disponibel atrobe 24 ora pa dia. Manera a ser informá kaba lo sigui ku algun trabou mas. Esakinan entre otro tambe stripmentu di e área na kada banda di e pista. E trabou aki ta kuminsá na òktober i lo dura dies luna. E área ta grandi, 900.000 meter kuadra i ta enserá kitamentu di kleps pa egalisa e área. Esaki pa kumplimentu ku e reglanan internashonal di seguridat. Esaki lo no stroba e operashon di e aeropuerto. Ora tur kos ta kla Boneiru ta poseé di un aeropuerto  ku ta kumpli ku  tur reglanan internashonal. Esaki ta úniko den Karibe.

DROB
Manera a ser informá komo un di e pasonan ku Gobièrnu ta tumando den e kuestion di material di konstrukshon (santu i piedra) ta ku lo mester a bin un quick scan. 
Situashon quick scan

E kompanianan di Ecovision i CEGE a kaba di hasi nan scan i ta bezig awor ku tèstnan otro pa si e materialnan ta bon sufisiente pa uso den konstrukshon.

Tambe nan a tuma mònster di tur e lugánan apuntá pa wak si e material aki ta di tal kalidat ku e por wòrdu usa de konstrukshon sin ningun problema.

Aktividat a korto plaso pa ku crusher

E kompanianan di crusher a wòrdu informá ku nan mester hasi pedido di material na DROB, bin ku e prueba di pago anto e material lo wòrdu buta na nan disposishon

Te ku awe no a bin ningun reakshon tampoko pedido di nan banda. 

Molèster di stof den área di LVV
Gobièrnu tan a altura di esaki. Komo ku tin kompania den e área aki ta serka di bebouwde kom tur kareteranan ku ta kondusí na e sitio aki ta wòrdu daña i e stof overlast ta kasi insoportabel pa e viviendanan den bisindario. Tin solushon  duradero pa esaki ya ku segun nos ROB kompanianan ku ta kousa hopi molèster mester wòrdu ubika den e zona di zwaar industrie kual ta St. Clara. Gobièrnu ta trahando riba esaki.

DEZA
Durante e temporada di aprel 2011 te ku awor Gobièrnu a entrega 182 pèrmit di establesimentu. Esaki kompará ku 64 pèrmit di establesimentu otorgá durante e periodo di Novèmber 2010 te ku Mart 2011. A prosesá tur petishonnan atrasá, pidi informashon adishonal i hasi kambionan nesesario. Departamentu di DEZA a hasi un trabou enorme i BC ta kabando pa firma tur e petishonnan atrasá aki.

Ta bon pa splika pueblo e proseder ora di
Petishon pa Pèrmit di Establesimentu (negoshi):

Despues di 10-10-10 no tabata tin hopi kambio den e proseso di petishon pa un pèrmit di establesimentu. Un pèrmit di establesimentu ta wòrdu pidi via di un formulario i e formulario aki por wòrdu hañá na ofisina di DEZA na Kaya Amsterdam 21, òf riba e website di DEZA ku ta www.bonaireeconomy.org.

E formulario mester wòrdu yena kompletu y tur dokumentonan adishonal mester wòrdu entrega athuntu. Esakinan ta keda entrega na ofisina di DEZA. E dokumento nan adishonal ku mester tin huntu ku e formulario di petishon ta:

Den kaso di un B.V. òf N.V.:

Kopia di pasaporte bálido;

Prueba di residensia (verklaring van woonplaats) no mas bieu ku 3 luna;

Kopia di statutonan/ aktu di notario;

Registro di akshonista (aandeelhoudersregister);

Kopia di pago di $140 na Eilandsontvanger;

Den kasonan ku niun direktor di e kompania no ta biba na Boneiru, ta pidi un karta ku ta apuntá un representante na Boneiru, un kopia di pasaporte bálido y un prueba di residensia di e persona aki.

Den kaso di un Eenmanszaak:

Kopia di pasaporte bálido;

Prueba di residensia (verklaring van woonplaats) no mas bieu ku 3 luna;

Dor ku un eenmanszaak no ta wòrdu lanta na notario y no tin statuto, e meta nan di e kompania mester wòrdu skirbi lesabel riba e formulario di petishon;

Kopia di pago di $140 na Eilandsontvanger;

E kambionan mas notabel ku a tuma lugá den e lei di pèrmit di establesimentu (Wet Vestiging Bedrijven BES) ta, ku e úniko motibunan pa nenga un pèrmit di establesimentu ta si e persona no por prueba ku e tin sufisiente medionan finansiero i/òf sufisiente abilidat (algemene vaardigheden) pa dirigí un kompania.
Banda di esakinan, persona nan ku lanta un eenmanszaak, ku ántes no mester a pidi un pèrmit pa esaki na Kolegio Ehekutivo, awor si mester hasi e petishon via di e formulario ya menshoná.

Na momentu ku un petishon wòrdu entrega na DEZA, y e ta kompletu, e siguiente akshon nan ta tuma lugá:

un prueba ta keda duna na e persona ku a entrega e petishon;

DEZA ta manda e petishon Archivo sentral di gobièrnu pa wòrdu registrá (akinan e ta haña un number);

Archivo ta manda pidi Kámara di Komersio konseho over di e petishon;

Archivo ta manda e petishon registrá bek pa DEZA;

Na momento ku e petishon yega DEZA bek, e konseheronan di DEZA ta traha un konseho pa BC;e konseho aki ta bai pa BC, via Archivo;

Na BC e konseho ta keda forma/ akordá dor e diputadonan, eilandsecretaris y gezaghebber;

Despues e ta bai bek Archivo pa registrá;

Na final di e ruta e ta bai bek pa DEZA, ku ta notifiká e kliente ku su pèrmit ta kla i ku nan por pasa tuma esaki.

E proseso kompletu tin un durashon di 6 pa 8 siman, pero dor di diferente faktor nan, manera kapasidat abou den e aparato di gobièrnu, ta pone ku e proseso por dura mas largu. Sinembargo DEZA ta trahando duru pa kita tur retraso ku tin, miéntras ta tratando tambe pa atendé e petishon nan ku drenta mesora, pa no krea mas retraso.

Pa persona nan ku ta bai lanta un negoshi den sektor di HORECA, na momentu ku e pèrmit di establesimentu ta kla, nan mester hasi un petishon pa un asina yama drank- en horecavergunning. Esaki ta por ehèmpel un pèrmit pa eksplotá bar, restorant, snack, pa por hür apartamentu etc.

Pa mas informashon tokante di pèrmit di establesimentu òf drank- en horecavergunning por akudí na ofisina DEZA tur djaweps mainta di mitar di 9 pa 11 or (8:30 – 11:00 am).