E aña aki nos lo organisá e di diesun Marshe di Estudio i Profeshon na Boneiru djasabra 8 di novèmber 2014, manera kustumber despues di e Marshe di Estudio i Profeshon di Kòrsou. Fundashon Ban Boneiru Bèk a bolbe tuma e enkargo pa organisá e marshe aki.

Un biaha mas e Marshe di Estudio i Profeshon lo tuma lugá den salanan di Jong Bonaire na Kaya Simon Bolivar. Partisipantenan por kuminsá drecha nan stènt for di 8.00 or di mainta. E marshe lo ta habrí pa públiko di 11.00 – 17.00 or.

Meskos ku tur aña komishon di marshe a skohe un lema pa yuda i stimulá hóbennan, futuro di Boneiru, pa nan informá nan mes debidamente tokante posibilidatnan ku tin riba merkado laboral i di estudio, pa nan por hasi un eskoho bon prepará. P’esei e lema di e aña akí ta:

                       Ta BOfuturo, Baip’e!

Ta di sumo importansia pa duna hóbennan un bon bista di posibilidatnan di estudio i profeshon, pasobra un hóben bon informá por hasi un mihó eskoho pa su futuro. Nos ta spera un kantidat grandi di partisipante e aña aki i nos ke enkurashá studiantenan/hóbennan i nan mayornan pa bin orientá i buska informashon tokante e posibilidatnan ku tin riba estudio i merkado laboral .

Marshe di Estudio i Profeshon 2013 tabata un éksito rotundo, ku un toke festivo pasobra a selebrá e di dos lustro. Un total di 39 instituto di MBO i HBO, kompanianan i instansianan di Aruba, Boneiru, Kòrsou, i Hulanda a partisipá.

BON FM a entrevistá partisipantenan i bishitantenan den un transmishon bibu di 3 or – 4or di atardi. A distribuí e di seis edishon di nos Revista “Studie Magazine” bou di bishitantenan. E aña aki tambe nos lo saka un “Studie Magazine”ku artíkulo- i entrevistanan interesante. Si bo ta interesá pa pone propaganda pa bo empresa den e revista aki, bo por manda e petishon na: sbmbonaire@gmail.com.

Durante di e marshe di 2013 a tene un enkuesta bou di e bishitantenan pa sa kua stènt nan a haña di mihó. Resultado di e enkuesta ta mustra ku bishitantenan a skohe e stènt di Korps Politie Caribisch Nederland komo ganadó. Por haña mas informashon tokante kontenido di e enkuesta den e relato anual 2013 riba wèpsait di Fundashon Ban Boneiru Bèk.

Tur partisipante di marshe 2013 a haña un karta ku informashon i un formulario di inskripshon pa e marshe di e aña aki via faks i/òf meil. Si tin kompania, organisashon òf instituto edukashonal ku ke partisipá, pero nan no a haña un formulario di inskripshon ainda, por fabor manda un meil na sbmbonaire@gmail.com pa por inskribí. Komishon di Marshe 2014 ta pidi kada unu ku ke partisipá pa inskribí promé ku dia 15 di yüli awor. Por haña mas informashon riba wèpsait di Fundashon Ban Boneiru Bèk, www.banboneirubek.com.

Persona di kontakto pa Marshe di Estudio i Profeshon 2014 ta: sra. Jacoline de Kruijf na: sbmbonaire@gmail.com Fundashon Ban Boneiru Bèk: www.banboneirubek.com