Ultimo chèns pa partisipá!

E aña aki lo organisá e di diesun Marshe di Estudio i Profeshon na Boneiru riba djasabra 8 di novèmber 2014, manera kustumber despues di e Marshe di Estudio i Profeshon di Kòrsou. Fundashon Ban Boneiru Bèk un a bolbe tuma e enkargo pa organisá e marshe aki.

Un biaha mas e Marshe di Estudio i Profeshon lo tuma lugá den salanan di Jong Bonaire na Kaya Simon Bolivar. Partisipantenan por kuminsá drecha nan stènt for di 8.00 or di mainta. E marshe lo ta habrí pa públiko di 11.00 – 17.00 or.

Meskos ku tur aña komishon di marshe a skohe un lema pa yuda i stimulá hóbennan, futuro di Boneiru, pa nan informá nan mes debidamente tokante posibilidatnan ku tin riba merkado laboral i di estudio, pa nan por hasi un eskoho bon prepará. P’esei e lema di e aña akí ta:

            Ta BO futuro, Bai p’e!

Ta di sumo importansia pa duna hóbennan un bon bista di posibilidatnan di estudio i profeshon, pasobra un hóben bon informá por hasi un mihó eskoho pa su futuro. Nos ta spera un kantidat grandi di partisipante e aña aki i nos ke enkurashá studiantenan/hóbennan i nan mayornan pa bin orientá i buska informashon tokante e posibilidatnan ku tin riba estudio i merkado laboral .

E aña aki tambe BON FM lo entrevistá partisipantenan i bishitantenan den un transmishon bibu. Otro for di añanan anterior e aña aki lo publiká un korant digital riba wèpsait di Ban Boneiru Bèk (www.banboneirubek.com).

Tur partisipante di marshe 2013 a haña un karta ku informashon i un formulario di inskripshon pa e marshe di e aña aki via faks i/òf meil. Si tin kompania, organisashon òf instituto edukashonal ku ke partisipá, pero nan no a haña un formulario di inskripshon ainda, por fabor manda un meil na sbmbonaire@gmail.com pa por inskribí. Komishon di Marshe 2014 ta pidi kada unu ku ke partisipá pa inskribí promé ku dia 25 di òktober awor. Por haña mas informashon riba wèpsait di Fundashon Ban Boneiru Bèk, www.banboneirubek.com.

Persona di kontakto pa Marshe di Estudio i Profeshon 2014 ta: sra. Jacoline de Kruijf na: sbmbonaire@gmail.com Fundashon Ban Boneiru Bèk: www.banboneirubek.com